المتحدث بإسم رئاسة الإنقلاب العسكري للتليفزيون الإسرائيلي حماس منظمة إرهابية...

ايهود باراك يطالب العالم كله بدعم السيسى

عبيد البيادة ... لسة حد ميعرفش فضيحة حسن ومراته على تليفون قناة الجزيرة !!!

مسيره ليلية بشمال سيناء فى جمعة الحسم 30-8-2013

جمعة الحسم | اخر قطار مترو قبل الحظر

رسالة لكل المرابطين في كل مكان من سيد درويش ..بصوتي

الصوت دا مسجلاه من زمان ..ماكنتش مغنية صح اوي فيه ..لكن كنت حابه اعمل الفكرة دي ..وحبيت اركب صوتي عليها عشان احس اني شاركت بفني عشان القضية زي ما باتمنى ..ولاني موش ليه نفس اغني اليومين دول ..حطيت صوتي القديم دا وخلاص رغم الاخطاء اللي فيه احسن من مافيش ..عشان احس اني عملت حاجة زي ماقلتلكم بفني عشان القضية ..

نعنسات انقلابية ..(جاية من نعنسة بما اني منعوسة :) ..ومانمتش من امبارح)

كان فيه حد قال ان لو الانقلاب حسنته الوحيده تمحيص الحق من الباطل واظهار (بروزة) المنافقين ..فهي تكفي ..قوم ايه ناس وراه بقى قالت هيـــــــــــــــــــــــــــــــــــــه احنا على حق وربنا محصنا من بتوع الباطل الوحشين ! وفرقنا عنهم ..ربنا بيعدنا عشان يستخدمنا لنصرة الحق ..احنا جيش ربنا !!....وهيـــــــــــــــــــــــــــه ..
(الدابة) لسه ماظهرتش على فكرة ولا الناس اللي انت كارههم دول ومعاديهم واللي منهم اخواتك ..واحيانا زوجتك ووالدتك او والدك كمان ..بقوا في جيش المسيح الدجال خلاص عشان تعتقد كده !! ..
ربنا لسه كاتب جولة اخرى مابين الحق و

الباطل على مايبدو ..ودي فرصة عشان تلحق اهلك الغلابة دول وتوعيهم بدل ماتعاديهم .......

ربنا محص الحق من الباطل اه ..لكن عشان يقول لكم حاجه تانية ياحدق منك له ..عشان يقول لكم .. انتوا مقصرين وموش قايمين بواجبكم عشان يعري انانيتنا وسلبيتنا ..عشان يقول لنا كنتوا فين لما اخواتكم واهلكم واولادكم اتأثروا بالافكار دي وبعدوا عن دينهم وقيمهم ؟..كنتوا فين وهما قاعدين امام التليفزيون بيتعملهم غسيل دماغ ؟ ..موش وعتوهم ليه ؟؟..موش فهمتوهم ليه ؟؟ ..الناس دول ضحايا ..وضحايانا احنا اولا قبل اي حد .. احنا اللي ربنا دلنا على الطريق وادانا العلم فتهاوننا في ارشادهم وفي توصيل العلم دا ليهم.. ..وقصرنا في حقهم ....
ربنا عمل كده عشان ينبهنا نقوم بدورنا نحو اقرب الناس لينا ..الضحايا اللي احنا ساهمنا في تغريب عقولهم بتطنيشنا وتكبيرنا ..
دول مطلوب من كل واحد مننا يستحمل سوء ادبهم وجهلهم وعصبيتهم من هنا ورايح ويقول ( كمان على طريقة الصعيدي اللي في فيلم اسماعيل يس ! ) ..وما يبطلش يتكلم معاهم ويزن على ودانهم بالحسنى من غير عصبية او سوء ادب ..حتى لو قاموا ضربوه ..لان في الحقيقة احنا نستاهل الضرب فعلا كلنا ..لان لما كان في ايدنا نعمل معاهم كده ونفهمهم بكل سلاسة قررنا ننام ونعتزلهم ونكبر ..فموش اقل من اننا نستحملهم دلوقتي مهما عملوا ..تكفيرا عن خطيئتنا دي ...

ازاي تعمل نظام غذائي لنفسك (عشان تخس او تتخن ) ..بناء على تجربتي الشخصية وشوية معلومات قيمة عندي ؛)

نصيحة للي عاوزين يخسوا الموضوع موش محتاج فتاااكة :))..قيس وزنك ..اعرف طولك ..قيس ضغطك  ..اعرف نسبة الدهون والميه والعضل في جسمك ..قيس نسبة السكر في دمك ..اعرف نسبة الاملاح عندك ..اعرف الاكل المناسب لفصيلة دمك في الدايت اللي هتعمله ..وابتدي اعمل لنفسك بناء على النتايج نظام طويل الامد  تستمر عليه بعزيمه واصرار :) ..ماتحرمش نفسك وتخلي النظام قاسي عليك ..وخلي يوم في الاسبوع للخبطه ..ومع الوقت اليوم اللي بتلخبط فيه دا هتلاقي نفسك مع استمرارك على النظام بقى يوم طبيعي موش لخبطه ...لوحدك ومن غير اجبار لان معدتك هتكون خدت على كده :)) ....اهم حاجه موش تستعجل وتستنى وقت كفايه (ممكن اسابيع ممكن شهور لكن موش سنين اطمن :) وخليك صبور) عشان جسمك ياخد على النظام والاكل الصحي ..

وتجبره على الاكل الصحي :) وتعوده عليه زي ماعودته على الاكل الغلط فترة طوييييييييله ؛> ..خلي النظام دا يكون نظام في حياتك عموما لو يوم لخبطته ..موش تلخبط الاسبوع او الشهر كله ..ابتدي من جديد تاني يوم علطول عاااادي ..وماتزهقش :)) امم تاني حاجه بناء على تجربتي الشخصيه هااقولكم ازاي تعملوا نظام لنفسكم دلوقتي بناء على التحاليل بتاعتكم :)) كلكم عارفين ان الوزن الطبيعي هوه طولكم ناقص 100 ممكن اقل او اكتر باتنين  تلاته كيلو موش اكتر ..لاقيتوا انكم في مرحلة الخطر ..فدا معناه انكم محتاجين نظام غذائي موش محتاجه فتاكه ؛> طيب ايه الاكل اللي بيتخن ..الاكل اللي بيتخن هوه الاكل اللي فيه نسبة سكريات ونشويات عالية ودا الجسم بيحولها ويخزن الفائض منها كدهون في الجسم في اثناء عملية الهضم ..وكمان المأكولات المالحة لانها بتخزن ميه زيادة في الجسم بتزود الوزن ..ومعروف ان الاكل المالح بيزود الضغط فلو ضغطك واطي موش تحرم نفسك ونظامك من الاكل المالح عشان تخس وخلي فيه نسبة املاح كفاية في اكلك عشان موش تتعب ..ولو ضغطك عالي طبعا فاانت كده كده لازم تبعد عن الاكل المالح ..كذلك لو نسبة السكر في دمك قليله فمعني دا انك تستخدم السكر الطبيعي وتبعد عن السكر الدايت وتاكل فاكهة وتخلى في نظامك حاجات مسكرة بنسب معقولة موش كتير عشان موش تتعب ..ولو السكر عالي عندك فاانت محتاج تبعد عن السكر كده كده ..وعن الاكل اللي بيزود نسبته في الدم :) ...وطبعا موش محتاجه اقولك ان لو عندك هشاشه او مشاكل في العظام والمفاصل فاانت محتاج  تفتكر في نظامك الالبان والاسماك طبعا :) ..وتعتمد على النظام الغذائي اكتر من الرياضة..,هكذا استمر :) ..اللي عايزاك توصله انك موش تعمل اي نظام تلاقيه كده وخلاص ..انت ممكن من خلال جدول السعرات الحراريه تعمل لنفسك نظام وتختار اللي يناسب ظروفك الصحيه اي كانت عموما موش لازم بس الامثله اللي ذكرتها هنا ..وانت ادرى بنفسك ..ماتخليش حاجه تمنعك ..ماتقولش ماينفعش اعمل ريجيم عشان ظروفي الصحيه مثلا يعني :) 

بالنسبة للرياضة ..فهي مهمة ودا لان الجسم لما بييجي يحرق طاقه محتاجها اما بتقلل اكلك ..بيستسهل ويحرق من العضلات لان حرقها اسهل من حرق الدهون ..(ودا بيضعفك طبعا ويخليك موش قادر تشيل كتاب) ويخلي الدهون عندك زي ماهي ووزنك بس بيقل لكن شكلك موش بيختلف ..او موش بيكون متناسق لان الوزن اللي قل دا قل بحرق العضلات موش الدهون.

.لكن لو لعبت رياضة ..جسمك لما بيروح عشان يحرق عضله ويلاقيك محتاجها وبتستخدمها موش بيحرقها وبيحرق الدهون ..واللي بتكون من الدهون اللي حوالين المنطقه اللي فيها العضلة غالبا ..عشان كده لازم تستخدم عضلة بطنك اللي موش بتستخدمها خالص دي ..واسهل تمرين معروف شعبيا انك (تشفط بطنك :)) ) لو عندك خشونه في العظام او عضمك تعبك ..موش لازم تجهد نفسك في التمارين ..ببساطه امشي نص ساعه بس في اليوم وانت شافط بطنك ..ولو تقدر ترقص ارقص :) دا تمرين بردو ..والسباحه (فرصة واحنا في الصيف ) رياضه موش مرهقه يقدر اي حد يقوم بيها كمان ..بس خد بالك لازم الرياضة مع نظام اكل والا وزنك هيزيد لان الاكل اللي بتاكله وقتها الجسم هيحوله لعضلات لانه هيلاقيك محتاج عضلات بسبب المجهود اللي بتبذله في الرياضة ..ودا مفيد طبعا للي عايزين وزنهم يزيد وصحي لهم ..وبيخلي جسمهم متناسق اكتر .. ان وزنهم يزيد بالعضلات ..لكن انت ياحلو موش محتاج زياده في وزنك خالص اساسا :) 

عن حرية اني اسمع روك وما احبش اللوك بتاعه ..واشجع فريق الاسماعيلي وما احبش اللون الاصفر ..اتحدث :)

حاولت كتير موش ابرر موقفي لحد ولا كنت طالبه من حد يفهمني ..بس الموضوع لما كبر وماحدش قدر يفهمني ولايوصلله اللي عايزة اقوله ..اتحولت لشخصيه سلبيه وبعت القضيه وقلت خلاص لاحد ينتقدني ويجرح فيه ..ولاانا احاول بطريقه فاشله افهم حد رافض انه يفهم اصلا ..فنقعد نزعل من بعض ونشيل من بعض :))  ..بس المشكلة اني ما اتعودتش انسحب واكون سلبيه عشان كده لازم الناس اللي موش فاهمه تحاول تفهم بقى ولازم انا ارجع اعمل اللي مقتنعه بيه ! ..
اي دين ( حتى عبادة الشيطان ) موش بيبقى مجرد طقوس روحية وبس ..واي اعتقاد فكري (حتى لو مادي.. شيوعية ..الخ)مابيبقاش مجرد ممارسات فكرية او علميه منطقيه ..عقلانيه وبس ..حتى اي انتماء فني (روك ..هيب هوب وراب ..) او رياضي (اهلي ..برشلونة ...) مابيبقاش مجرد هتاف وتشجيع ولف على ماتشات وحفلات وبس .. اي دين او اعتقاد او انتماء ..هو حاله ....بتشمل طقوس روحيه وممارسات عقلانيه ووجهة نظر معينه للحياة..وحب لحاجات وتجنب لحاجات كده اجبارا لمجرد انك بتنتمي للاعتقاد دا!..بتبقى مجبور ..ايوه !! ..ايوه كلنا مجبورين من عقولنا وارواحنا.. (يعني في اسلامنا احنا مجبورين كده عافيه نحب كل الناس ونعاملهم حلو ..غصب عننا !! )..
كمان بتشمل ستايل معين في اللوك واللبس ..ذوق معين في الاكل (اكل اسلامي ..اكل نباتي للطبيعيين والناس دول )..وفي اللي بنسمعه احيان كتير .. وممكن يشمل سلوكيات حياتيه كمان معينه نلزم بيها في حياتنا اليوميه العاديه لحبنا للدين او الاعتقاد دا ..عشان كده لما كنت بااحط صور ليه بشعري كنت بااحاول اكسر عند الناس الحاجز دا ..كنت بااحاول افهمهم ..كنت بابقى متعمده دا موش حبا في شكلى ولارغبه في شوية لايكات وتعليقات ..لكن عشان افهم الناس موضوع معين ..وهوه ان ممكن ببساطه حد يلبس جلابيه ويربي دقنه وياخد باللوك الاسلامي لكن روحه في منطقه وعقله في منطقه تانيه خااالص ..وقلبه مع ناس ومع اعتقاد ميال له تالت خااااااااالص ..وبيعمل حاجات عكس كل ميوله واعتقاداته وشكله كمان في الاخر ..والناس تقول عليه مسلم صح !..و لو حد روحه في الاسلام وعقله مقتنع جدا بالنظريات الاسلاميه وبالحلول والطروح الاسلاميه ..ووجهة نظره للحياة وللخلق والموت والاخرة والدنيا ..هي نفس وجهة النظر الاسلاميه وقلبه متعلق جدا بالاسلام وتاريخه وتراثه ومعتقداته وطقوسه وكل.. كل حاجه ..وبيشتغل وبيتعلم وبيخدم وبيروح وييجي عشان بس الاسلام وعشان بس حبه له ولربنا ..و بيعمل اي حاجه ونيته خالصه لربنا بيها ..يقصده بيها وبس ..حياته كلها بيحاول يقرب من الاسلام ويكون جزء واضافه له ....بس الاخر موش عامل اللوك الاسلامي .ييجي اخينا اللي فوق صاحب اللوك الاسلامي ..لوك فقط لاغير :)..وييجوا الناس اللي بيدعموا اخينا صاحب اللوك الاسلامي ..وشايفينه صح من المتخلفين .. يهينوا الشخص دا وينكروه ويقصوه ...
معاكم ان الصح اوي والكويس اوي والاكثر ولاء انه يلتزم بالمظهر الاسلامي ..وانه فعلا كل ماباطنه صلح كل مادا هينعكس على ظاهره ..بس احنا بشر ..مركبين ومعقدين بطريقه موش يعرفها غير خالقنا ..يمكن فيه خلل في شئ معين يمكن هوه بيعمل كده لهدف معين ..انه يقرب من الملحدين مثلا والناس اللي فاهمين الاسلام غلط ..عشان يفهمهم انه اخر حاجه في الاسلام هي المظهر ......
الاسلام عقيدة وايمان الاول ..بس للاسف كان المفروض يفهم المسلمين اللي زيه الاول قبل مايفهم اللي على غير دينه اللي بيحاول يؤلف قلوبهم ..اللي اعتقد وهما شافوه بيتشتم من اهل دينه او بينتقد بسبب الموضوع دا زادوا في عنادهم اكتر :((..
في الاخر.. ارجووووووكم خليكم فاكرين ربنا يذكرني واياكم اننا بشر موش اتخلقنا عشان نحكم على بعض ابدا ولامن حق حد فينا يحكم على التاني ابدا ..كلنا مخلوقين عشان ربنا وبس عز وجل يحكم علينا في الاخر..

في اللي ليكم واللي عليكم ...

فيه حاجات صغيرة كده في القرآن الكريم والاحاديث الشريفة وحتى في الحكم والامثال بتعدوها وموش بتاخدوا بالكم منها رغم انها بتبقى المغزي من الكلام  اصلا في معظم الاحيان .. زي مثلا في حديث الرسول صلى الله عليه وسلم (خياركم في الجاهلية ..خياركم في الاسلام ...) ناس كتير في مجالي الدعوة والتأريخ الحديث دا على لسانهم دايما دلوقتي ..طب وبالنسبة لباقي الحديث ..( اذا فقهوا )..؟؟ ..هما موش هيبقوا من خيار المسلمين زي ماكانوا في الجاهلية من الاخيار الا اذا فقهوا ..وزي الايه الكريمة من سورة النساء (...فاانكحوا ماطاب لكم من النساء مثنى وثلاث ورباع ..) طبعا معظم البنات عارفين باقى الايه وبيكملوها لوحدهم :) وموش محتاجين اكملها ..فالمطلوب منكم ياريت زي مابتاخدوا بالكم من الحاجات الصغيرة دي في اللي ليكم وبتدوروا عليها وتوجدوها !..تاخدوا بالكم منها في اللي عليكم كمان ..لانه عليكم ..عارفين يعني ايه عليكم ؟؟ .. يعني اللي ليكم :) !عشان اللي عليكم .. هو اللي لو أدتوه هيبقى باقي ليكم :) ! 

في اربعة وعشرين ساعة ازاي تنسى حد اتعلقت بيه وترجع لحياتك الجميله تاني :)

1. اولا لازم تستعين بالله وتطلب منه وتدعيه دايما وفي كل وقت انه يشفي صدرك من المرض دا ويساعدك تنسي وموش يخلي قلبك يتعلق بغيره ابدا ..كل يوم وكل وقت وكل دقيقة بصدق فعلا وباخلاص وانت حابب ان قلبك موش يتعلق بغيره  وعشانه ابدا.. فعلا من جواك
2. تاني حاجه لازم تستجمع  كل قوتك واراددتك عشان تعمل اللي جاي في النوته دي من نصايح  وتقرر فعلا من جواك انك تنسي وترجع لحياتك الجميله اللي كلها صفاء ونقاء ورضي واخلاص تاني بعيد عن الامراض دي  :) 
3. افتكر دايما ان الدنيا زايله وانها موش مقر وان مافيش حاجه فيها تستاهل ابدا اصلا !وافتكر ربنا دايما واملى بيه قلبك :)
4. حزاااااااااااري ثم حزاااااري ثم حزااااااري من الاستماع للاغاني والافلام في البداية خصوصا ..خصوصا ..الرومانسيه والحزينه وان حصل وحد شغل قدامك الكلام دا وموش عرفت تطفيه او تبعد عنه فماتركزش فيه ولو ركزت رد علي كلام الاغنيه بينك وبين نفسك بسخريه ..مثلا لو الاغنيه بتقول اعبدك وحياتي فداك قول هوه انا ينفع اعبد حد ولا حياتي تبقي فدا حد غير ربنا وعشان ربنا وبس !!يعني وكمل انت علي المنوال دا لو فهمت قصدي ..
5. وكمان اعمل (ان لايك)  لكل الصفحات اللي عندك وبتعمل بوستات هبله زي.. مااقدرش انساك ..ولو ماكنتش قدري هتفضل حبيبي !! ..وموش عارف ايه تاني كده  واول ماتلاقي في الفيس بتاعك اي بوست اهبل كده ادخل علي الصفحه اللي منزلاه واعمل لها ( ان لايك) وماتفكرش في البوستات دي ولا تركز فيها ولا تبص لها اساسا ركز في البوستات الايجابيه والكويسه وشوف المآسي اللي بتحصل حواليك في البلاد الاسلاميه والعربيه :(( وحس قد ايه انت تافه ان هي دي مشكلتك وحس قد ايه انت  ضعيف لانك موش قادر علي نفسك وفكر ازاي هتقدر علي عدوك لو موش قادر علي نفسك في يوم من الايام لو حصلت المواجهة دي ؟؟!!:((
6. ندخل علي النصايح بقى :) ..اولا لازم تمسح رقم تليفونه وكل رسايله اللي بعتها له وبعتهالك حتي (بليز كول مي :) ) عشان موش تعرف توصل لرقم تليفونه ابدا ..ولو حافظ الرقم فلازم تحاول تنساه خالص وكل ماتفتكره تفكر في حاجه تانيه بسرعه وكل ماتحاول تتصل بيه تعمل اي حاجه تانيه وتفتكر كل الحاجات الوحشه اللي عملها معاك وتفتكر ربنا والدعاء اللي بتدعيه له باانه ينقي قلبك ويصفيه وتساعد نفسك ..لايغير الله مابقوم حتي يغيروا ماباانفسهم 
7. وايضا علي الفيس بوك لازم تعمل  له بلوك وتعمل بلوك كمان لكل الاصدقاء المشتركين بينك وبينه حتي لو ابوك :) ولو لفترة مؤقته خصوصا في البدايه عشان موش يتبقي اي شئ يفكرك بيه او اي شئ من ريحته يخليك تضعف ..
8.  لو لسه فيه كلام حابب تقوله له او عتاب فموش تعمل كده ابدا وافتكر انك نهيت الموضوع خلاص وماينفعش عفوا في اللفظ ترجع تاكل حاجه رجعتها قبل كده وفكر ان العتاب دا للي يستاهل واللي انت باقي عليه وكل اللي هتعمله وقتها لو فيه اي كلام لسه عايز تقوله له انك تجيب ورقه تكتب فيها كل الكلام اللي عايز تقوله سواء عتاب او شرح وتوضيح او حتي شتايم وبعد ماتخلص تحرقها وتبصلها كويس قوي وانت بتحرقها وتقول بيقين من جواك وبقوة (انا خلاص رميت الحقبه دي من حياتي ورا ضهري في الزبالة )..او تحفظ الورقة او الرسالة عندك على الفيس مثلا من غير ماتبعتها ..طريقة التأجيل يعني ..يعني الورقة اللي فيها كل اللي جواك واكتر موجودة وفيها كلامك ..واهي متلقحة :) ..اوعى تبعتها مهما جرى خليها بس موجودة قدامك مطمناك ان كلامك موش راح في الهوا وانه لسه موجود ..وكل مرة قول موش هابعتها دلوقتي كمان يومين او اسبوع ابعتها ..لغاية ما الوقت يمر وتبقى موش ليها لازمة وانت كمان تكون قويت ..ان شا الله بعد سنتين ...بس بعد السنتين دول تحرقهها بايدك وقدام عينك ياحلو :)..
9. كل ماييجي علي بالك او تفتكر حاجه له كويسه افتكر دايما كل المواقف والحاجات الوحشه اللي عملها معاك وافتكر ان الحاجات الوحشه اللي عملها معاك حتي لو كانت قليله فأثرها عليك اكبر بكتير من عددها لدرجة انه يمسح الحاجات الكويسه مهما كتر كمها .. فتتضاءل كل الحاجات الكويسة دي قصاد اهانته او خيانته او قلة ادبه او كدبه او اي شئ تاني وممنوع تفتكر اي حاجه كويسه دايما الحق نفسك وافتكر الحاجة السيئة قبلها 
10. افتكر صفاته السيئة دايما كل  بني ادم مهما كان ناجح او غيره فله صفات سيئة فركز عليها وافتكرها دايما كل ماييجي في بالك 
11. لو موش قدرت انك تبطل تفكير في الحاجات الكويسه او الذكريات الكويسة اشغل نفسك بسرعه في حاجه تانيه لما تلاقي التفكير جالك ..صلي .. اشتغل .. زاكر ..او العب حتي 
12. فكر ان العالم فيه سبعه بليون شخص ومصر بس فيها مايقارب مليار شخص لو شلنا منهم خمسمية مليون (نص المليار يعني ) رجاله هيتبقي خمسمية مليون  واحده :)  لو شلنا منهم ميتين وخمسين واحده متجوزين هيتبق ميتتين وخمسين لسه لوشلنا منهم ميه خمسه وعشرين اططفال هيتبقي ميه خمسه وعشرين كبار لو شلنا منهم اتنين وستين مليون وخمسميت الف عواجيز هيتبقي اتنين وستين الف سنهم مناسب لو شلنا منهم واحد وتلاتين مليون وميتين وخمسين الف موش ملائمين لك لاي سبب هيتبقي واحد وتلاتين مليون وميتين ووخمسين الف مناسبين لك لو انت بقى معقد ومحتاج صفات معينه وبتدقق اوي اكتر من كده فشيل نص كمان هيتبقى  لك علي الاقل خاااالص خمستاشر مليون واحده مناسبه فيهم سبعه ونص مليون واحده علي الاقل احسن منها ...او احسن منه يابنات ركزوا معايا وخدوا بالكم بردوا :)) ودا في مصر بس ! يعني لو خرجت بره مصر في رحله او عمل فرصك هتزداد عن كده كمان :) !!
13. كمان فيه حاجه مهمة جدا نسيت اقولكم عليها ..لو لكم اي ذكريات معينة ومميزة مع الحد دا اصنعوا زيها مع ناس تانيه او افضل منها كمان لو استطعتم ....عشان موش يبقى لهم في ذاكرتكم مكان مميز او يبقى لهم حدث مميز او اي حاجه مميزة موش حصلت الا معاهم وبس تفكركم بيهم ..زي لو قضيتوا عيد ميلادكم مع الشخص دا فيه مكان معين لوحدكم او مع ناس اعمل عيد ميلاد احلى في نفس المكان مع صديق عزيز عليك او مع مجموعة من اهلك واصدقائك بتحبهم جدا لو اديتله هدية مميزة في يوم ممكن تكون رسالة مثلا ادي رسالة زيها لصديق عزيز عليك ..او لو اديتله بلورة فيها كلام او رسومات (من اللي كانوا موضه دول :) ) ادوا بلورة زيها لطفل يتيم جميل تفتكر البلورة بيه وبوشه المبتسم البرئ موش بالشخص القذر دا حد فهم قصدي :)) ؟؟
14. واخيرا وليس اخرا :) فيه فكره حلوه اوي جربتها عن نفسي ونفعت فعلا :)) وهي انك تفكر ابشع حاجه بتقرف منها(عن نفسي فكرت في الزباله ) وفيه ناس بتقرف من الشحوم وناس من المجاري يع :))..المهم فكر في الحاجه اللي بتقرف منها اوي دي وتخيل اللي انت اتعلقت بيه دا خارج منها وعليه زبالة ملوث بيها وخارج جاي ناحيتك وهو مبتسم منها :) ...وانساه بقي يااخي زهقتني الموضوع بسيط والله خليك قوي وعندك ارادة بقى :)))

بالنسبة لموضوع الحجاب..

 ياجماعه ارجوكم انا معاه جدا وعمري ماكنت ضده بس كل المشكله هوه مفهومه عندي ايه.. ... الحجاب من الحاجات اللي عليها اختلاف  وكلام واجتهادات وتفسيرات ..الحجاب عندي من اول الاحتشام في اللبس ..لغاية النقاب ..مافيش نص صريح من الرسول صلي الله عليه وسلم او في القران الكريم بيقول للنساء غطوا شعوركم ! ..وماكنش هيعيي النبي صلي الله عليه وسلم انه يذكر دا في اي حديث مادام الموضوع فرض ومهم جدا كده ...وكمان ربنا استغفر الله العظيم يارب ماكنش يصعب عليه يذكر في الايه (وشعورهن )مثلا ..الموضوع محل اجتهاد من الاخر ..وكل مجتهد وله ثواب بقى .. والكلام اللي في الايه الكريمه ربنا انزله علي الرسول صلي الله عليه وسلم في ايام معينه كمان  ..في زمن معين ..عشان  يفرق فيها الناس بين نساء الرسول صلي الله عليه وسلم ونساء المؤمنين وبين الاخريات ..هوه فضيله وشئ جيد عموما ..هوه سنه عن امهات المؤمنين ماشي ..هوه من عادتنا وتقاليدنا  ممكن ..لكن ماحدش يفرض عليه حاجه فيها كلام واجتهاد ..ومن الاخر فككم بقي من الحاجات اللي فيها كلام واجتهادات زي الحجاب وزي الدقن وغيره ..الكلام في دا كله مهاترات ومضيعه للوقت ..ركزوا بقي في الحاجات اللي موش عليها غبار .. ولاحد يقدر يتكلم فيها زي الجهاد في سبيل الله وزي الصلاة ....الي اخره ..لان دا اللي مضيعنا ..بندور في الفرعيات ونسيب الاصول :(

ومن الاخر بردو بلاش نتكلم عن الحجاب الاستعراضي بتاع اليومين دول ..دا اسمه نفاق لو هنتكلم ونقول بقي ...الحجاب له مواصفات شرعيه معروفه ... واللي بيتلبس اليومين  دول بقي.. لبس فلكلور من عادتنا وتقاليدنا من قديم الازل ... مجاراة للعادة وللمجتمع.. بس من الاخر هوه اصبح ضحك علي الدقون بااسم الدين .. بجد دا هبل من الاخرانتوا مصدقين نفسكم !! 

الحجاب موش المفروض يكون زينه في نفسه (فيه الوان او زخارف او حلي او اي شئ ملفت عموما)..او للخيلاء (يعني موش من مول ايه ولا مصمم مين عامله ولا بفلوس قد ايه ولا اميرة مين ولا زوجة مين بتلبسه !!)..او لبس رقيق (يعني واسع بس قماشته رقيقه بتوصف الجسم)وماينفعش يكون ضيق  طبعا  ولاينفع  اللي لابساه تكون متبرجه ..ولا اللي لابساه تقلعه عند خالتها ولا في فرح  ...يعني اللي بتطلع بنص كم في الصيف للبلكونه او تقعد بنص كم عند خالتها  ..

مع ملاحظة ان الحجاب اللي بااتكلم عنه هوه ستر الجسد دون الشعر لغاية موش بااتكلم في دا كله علي الايشرب اللي بيتحط علي الشعر يعني واللي موش ورد  ذكره حتى في حديث عائشة رضي الله عنها ..اللي ماكنش هيعييها هي كمان وهي بتورد صفات الحجاب انها تقول انه لازم يغطي الشعر كمان ..رأس الانسان ووجهه موش بيضمنوا في الحديث عن الجسد ...وهي قالت يغطي الجسد ..

وملحوظة مهمه بقي في الاخر انا موش بااعتبر نفسي محجبة طبعا عشان حاطه قماش علي شعري  اسفه الحجاب له شروط تانيه... ممكن تبقي واحده منقبه كمان لكن موش محجبه.. كفايه قرف بقي 

وكمان كلامي دا انا موش بادعو غيري لاعتناقه ابدا ولا بافرضه كرأي دا مجرد اجتهاد اتحمل تبعته وحدي امام ربنا ..وربنا احترم عقلي واداني حرية التفكير والرأي ..وخلى ليه ثواب على اجتهادي في امر مادام بحثت فيه حتى لو اجتهادي اخطأ ..وموش هاسمح لحد يسلبني الحرية اللي ربنا عز وجل ادهالي دي تحت اي دعوى ..حرة البسه كسنة ..كمظهر اسلامي ..مظهر جميل وراقي على فكرة ..لكن موش فرض ..

النور قطع..

..فجأة النور قطع .. التلاجه والغسالة والتليفزيون والكمبيوتر والدي في دي فصلوا ...الكشافات والكاميرا والبي بي واللاب  والاي بوت والموبايل والام بي ثري  خلص شحنهم .. ولسه النور قاطع ....خرجت للبلكونة اتونس بضي القمر وفي الظلام الحالك دا....وفجأة وانا قاعدة لوحدي ساعة الفجرية موش سامعه غير صوت شهيقي وزفيري عدت نسمة هواعليلة من جمبي ! :) غطت علي صوت شهيقي وزفيري وزودت ونستي وخلتني اشعر بسكينة وامان وسعادة غامرة وراحة بال!.. حقيقي حسيت بدا كله وبمليون حاجه كمان في الثانيه اللي عدت فيها النسمة دي !  .......وحسيت بالفه ..حسيت اني اعرف النسمه دي وانها موش اول مرة تعدي من جمبي :) ..لاني ببساطة موش اول مرة احس الاحساس دا  .. قعدت افكر امتي حسيت بالهدوء والتوازن والراحة والسكينة دول كلهم قبل كده  بمجرد مانسمة عدت من جمبي   . . ومافكرتش كتير بصراحة  عشان  مااطولش عليكم الذكري قفزت لذهني فجأة بردو زي ماعدت النسمة فجأة ..وافتكرت ..افتكرت ليالي الصحراء المقمرة البعيدة طافت عليه بروايحها ونسيمها وعبيرها بعد ماكنت تناسيتها .....هناك ..هنــاك بعيد عن الصخب  والمدينة ..بعيـــــــد بعيــد عن الاغاني الهابطة وافلام السبكي وبناطيل الرجالة الحمرا والبينك :) بعيد عن الزيف والكدب بعيد عن الخطايا والنجاسة والنفاق بعيـــــــــــــــــــــــــد

..الكلام دا كان لما سافرنا  ايام الانتفاضة الفلسطينية الثالثة لسينا مليانين ايمان وعزيمة وحب.. فاكرين اننا هنحرر الارض وهنروح..وموش هنرجع ..رايحين بنفوس صافية ونقية تمام زي الصحرا اللي كنا فيها ..هناك استضافونا عرب من اهلها اتعاطفوا معانا وحسوا بنبل نوايانا  وحاولوا يساعدونا ..عرب عايشين في خيام في الصحرا وفي بيوت بدائية جدا يادوب الكهربا اللي فيها  بتضئ سهرايات ((لمبات صغيره اضاءتها لونها برتقالي :) للي مايعرفش)) بالليل ... سهرايات بيشغلوها من مولد كهربا عندهم عشان موش عندهم  كهربا اصلا زي عندنا كده :)..سهرايات ممكن يستغنوا عنها بالشمع اصلا كمان :)!! .. ناس مستغنيين عن كل الرفاهايات الزيادة اللي بتشكل عبئ علي البني ادم المدني .. ورغم كده عايشين في سعادة ورفاهية من نوع خاص جدا !..طوروا نفسهم وحياتهم واساليب الراحه والرفاهيه بتاعتهم بس علي طريقتهم !!.. صحتهم كويسه ومثقفين جدا ومتابعين اللي بيحصل في الدنيا ..بيقدروا  يتعاملوا مع الموبايلات والكمبيوتر والاجهزة الكهربائية ويصلحوها كمان رغم انهم اصلا موش بيستخدموها !!!.. مافيش شبكة اتصالات اساسا في الاماكن اللي عايشين فيها ولا اللي بيروحوها ورغم  كده بيعرفوا يتصلوا ببعض ويوصلوا لبعض وقت مايعوزوا ! وبيبقوا مطمنين ان ماحدش بيتصنت علي مكالمتهم  او بيقتفي اثارهم ؛>..عايشين في غني عن كل الاعباء اللي الحياة المدنية الزائفه اثقلتنا بيها ..الحياة المدنية الزائفة اللي صنعتها لنا (قوي ما) عشان تثقلنا باعبائها وتشغلنا بيها  عن ماهية وجودنا  وعن مقدساتنا وقضيتنا الكبري وتلهينا بيها وتزقنا في مفرمة كبيرة الي ان تقرر الـ (قوي ما )انها تضغط علي الزرار :)) وتطفي المفرمة دي وقت ماتعوز (بما انها هي اللي بتملكها اصلا وبتملك مفاتيحها بالبداهة! )ونلاقي نفسنا وقتها في ظلام حالك كنا نحسبه نور بائن.. والناس اللي كنا بنفتكرهم في ظلام بائن هما اللي في نور بائن :) !...نور ايمانهم وفخرهم وغناهم ..غناهم عن اي شئ يذلهم .. عن اي شئ موش من صنع ايديهم ..عن اي شئ موش معاهم مفاتيحه ..الناس اللي وعوا للحقيقة دي واحتاطوا  بعدها  .. وموش كانوا زينا كالغنم المساقه ورا بطونها....او كالدواب المسحورة بعزف الناي  .. وقتها بس ..وقت مانبقي في الضلمة دي ..هنشوف الحقيقة واضحة قدامنا زي الشمس  لكن هيكون بعد فوات الاوان :(..يمكن بعد فتنة الدجال .. او يمكن بعد طلوع الشمس من مغربها او حتي بعد ظهور الدابة  وتفريقها للمؤمن والكافر ..!  مين عارف امتي؟؟.. الله اعلم .......كل دا تقاذف الي ذهني تدريجيا وورا بعضه وانا قاعده في لحظة تأمل خاصة جدا  زي ماشفتوا فحبيت اشارككم  بيه  واعرف  تعليقاتكم ..! :) وبس النور جه خلاص والفجر ادن والناس راحت تصلي :))

ميثاق متحررة من القهر ..مقهورة سابقا ..

امي امرأة بسيطة حاصلة على شهادة تعليمية متوسطة ..وكالملايين في هذا العالم لم تتحصل على ثقافتها المحدودة ..وعلمها المتواضع في شتى المجالات الا عن طريق التلفاز (دجال هذا العصر) ..
ومنذ صغري تعلقت بالقراءة ..واحزنها هذا التعلق حزنا شديدا كالكثيرين من الامهات والاباء .. ممن يحزنهم هذا بحجة انه (اي التعلق بالقراءة) يعطل عن الدراسة ...فكنت اتسلل من ورائها الى مكتبة ابي (المتوفي) وانهم في القراءة في اوقات نومها .. وفي المرحلة الاعدادية حين اصبحت مدمنة على القراءة  وعلى استعارة الكتب وشرائها ..نشطوا في البيت لتخبئة تلك الكتب مني ..بل وحرقها وتمزيقها هي وكراريسي الصغيرة التي كنت امارس فيها هوايتي في كتابة الشعر والمقالات والقصص القصيرة في هذا الوقت ..وكنت العب معهم لعبة (الاستغماية) طوال الوقت من اجل تخبئة كتبي وكراريسي منهم ..والتي للاسف كانت دائما ما تنتهي في صالحهم ..حتى ان اخوتي الصغار نشطوا في التبليغ عني اليهم ان رأوني اكتب او اقرأ او عرفوا اماكن من اماكني التي كنت اخبأ بها كنزي هذا ..وكنت اعاقب حينها عقابا شديا ..
اما في المرحلة الثانوية كنت قد (اتفضحت) :) واشيع عني في العائلة كلها ..انني قد قرأت في الماركسية والشيوعية وتأثرت بتلك الافكار ..لمجرد انني تجرأت في مناقشة بعض الموضوعات والتساؤل حول بعض الاحداث ..رغم انني حقا لم اكن قد قرأت في كل ذلك وقتها! ..
ولذا فأنا متعاطفة مع دكتور مصطفى محمود جدا بالمناسبة .. لانني متقاربة معه جدا فكريا (رغم تواضع علمي بجانبه طبعا ) ..وادرك تماما واقدر مااشيع حوله ..واتفهم تلك الحروب التي دارت حوله ايضا طوال حياته لهذا السبب ..وذلك ليس فقط بسبب ما اشيع عني في عائلتي من انني تأثرت بالافكار الماركسية.. بسبب حبي للقراءة والمعرفه ..كمثال مصغر لما حدث معه ..ولكن ايضا لاسباب اخرى اعتبرها امثلة مصغره ايضا في حياتي لما حدث معه ..كانفتاحي فيما بعد على الافكار والعقائد المختلفه وعلى اصحابها ..واستماعي اليهم ..وكيف ان هذا جعل هؤلاء يظنون اني كنت انافقهم ..بعدما استقر ذهني على مبدأ وعقيدة غير كل مايؤمنون هم به  ..وماكنت حقا سوى مستمعة ومصغية اليهم باهتمام وابتسامه صادقة ونية صافية ..لمعرفة افكارهم وعقائدهم بحثا عن الحقيقة ..التي كنت على استعداد لاعتناق افكارهم وعقائدهم لو اكتشفتها معهم حقا ..
وكذلك ماقيل عني في السنه الماضية بأني اخوانية!! ..وبأني اسعى لمنافقة السلطة كي يدعمني من يقومون عليها في فني الذي كنت منقطعة عنه في ذلك الوقت اصلا :) !! وذلك لمجرد اني ادعم مواقف اناس اعتقد بتقاربي الفكري معهم ..وبصحة مواقفهم هذه تبعا لما اعتقد به ..و ذلك حق لي سواء كانوا في السلطة او في المعارضة ..او من المضطهدين ..فلن يردعني شئ في الدفاع عن فكري .....
وايضا ماقاله عني المتشددين في الدين .. من اني زنديقة ويجب ان اعود عما انا فيه.. لمجرد اني اعملت عقلي كما امرني الله عز وجل في بعض الامور كالحجاب مثلا ..
.....هاااااااااااااااااااااااااا
ولنعود الي قصتنا الآن كي لانتشتت ..قصة قهري ..وليكن لذلك الامر حديث اخر ..
.....فقد قهرت حقا واستسلمت بعد كل هذه الحروب التي شنتها عائلتي علي ..وانقطعت عن الكتابة وفتر حماسي نحو القراءة فلم اعد اقرأ الا كل حين وحين ..وتجنبت الدخول في مناقشات مع احد...ولكن مع دخولي الى عالم الفيس بوك ..زال الرماد عن المقبرة التي دفنت فيها حبي للكتابة ..وعاد الامل بداخلي مرة اخرى في ان اكتب كما يحلو لي بدون ان يستطيع احد منعي من ذلك ..بل ان هذه المرة سيكون هناك من يتفاعلون مع ارائي وكتاباتي تلك ..وياله من حافذ عند اي كاتب حقيقي !..
ولكن للاسف لم اعمل حسابا لاغلاق حسابي يوما :) ..فصرت اكتب واكتب بدون ان احتفظ بمسودات لكتاباتي كالعادة ...وانشأ الجروبات التي تعبر عن ماانوي الكتابة بشأنه .....لأجد فجأة وبدون مقدمات ان كل ماكتبت ..سواء في صفحتي او في تلك الجروبات قد ضاع واختفى كأن لم يكن ..باغلاق الفيس بوك لحسابي :( ..والذي اعزاه بعض زملائي في الكفاح وقتها وبكل حماس :) ..الى ماكتبته في الشئون السياسية على تلك الصفحات ....ولكنني كنت اعلم ان الحقيقة غير ذلك ..فالحساب اغلق وقتها لانني تماديت في طلبات الصداقه التي لم اكن ادرك وقتها انها مفروض للاشخاص الذين نعرفهم وفقط وان غير ذلك من الممكن ان يؤدي الي اغلاق حسابي كما تعلمون ..:)
 ..وايضا من يعرف... فربما حقا اغلق بسبب كتاباتي ايضا :).. فربما رفض هؤلاء  طلبات الصداقه التي ارسلتها اليهم وقتها بسبب تلك الكتابات السياسيه والفكرية ..والتي لم تأتي على هواهم ..
المهم ..انشغلت بعدها وفتر حماسي نحو الانترنت والفيس بوك الملعون الذي اضاع كل جهدي هدر ..تماما كما ضاع في الماضي بتمزيقه وحرقه ...
وانشأت حسابا اخر فقط للتواصل مع زملائي واصدقائي ..وكنت ادخل عليه كل حين وحين ..ولكن مع تسارع الاحداث وتعاظمها لم استطع منع نفسي من العودة الى الكتابة ..بصعوبة وحذر ..ولكني عدت ..ولأنني لا املك سوى وسيلتين للتعبير عن نفسي الا وهما الكتابة والفن ..ولأنني في ذلك الوقت كنت اعمل بالفن فعلا ..وكان ذلك يشبع رغبتي تلك في التعبير عن نفسي نسبيا ..فكنت لا اعمل على تطوير ادواتي في الكتابة ..ولا اكتب كثيرا اصلا :) ...
وفجأة بوغتت كل مشاريعي الفنية وكل ما كنت انوي تقديمه من خلالها ..بسبب حادثة اضطرتني الى علاج اسناني ..فقمت بعمل عمليتين جراحيتين لمعالجة التهاب في عظام الفك ..وذلك من خلال القص من هذه العظام ..مما افقد فكي تناسقه ..واثر على تناسق وجهي في العموم ..وعانيت بسبب ذلك كثيرا ..واخيرا لمعالجته لم يكن امامي حل سوى تركيب تقويم لاسناني ..وطوال تلك الفترة التي امتدت منذ تلك الحادثة الى الان ..عانيت الامرين بسبب فقداني القدرة على التواصل مع الناس والتعبير عن ذاتي ..فكنت دائما ما اخجل من مواجهة الناس وابتعد عنهم ..وان حدث ذلك كنت اضع يدي مغطية بها فمي حين محادثتهم ...
وهكذا ..
لم يعد لي ملجأ سوى الكتابة فعدت اليها ..عودة المغترب الى وطنه ..
عدت اليها شاعرة ببعض الغرابه ..ومواجهة لبعض الصعوبات بسبب طول بعدي عنها ..
ولكن كما يدفع المغترب حبه لوطنه الى عبور كل هذه المشاعر.. والمشاكل والتغلب عليها وحلها .. لترسيخ اقدامه في وطنه المحب له والذي مابعد عنه الا قهرا ..دفعني حبي للكتابة التي مابعدت عنها الاقهرا ..الى الرجوع لمذاكرة قواعد النحو واللغة والبلاغة ..ومحاولة االتغلب على مافاتني من مستجدات في هذا الامر باثراء نفسي بالعلم والقراءة والمعلومات اكثر واكثر ..
....واضع بيني وبينكم الان فصاعدا ميثاق شرف حول كل ما اكتب
 بأن اتحرى الحق والموضوعية وان ادافع عن المقهورين واناظر القاهرين وان لا اخشى في الله لومة لائم باذنه عز وجل..
..وذلك هو الجهاد بالكلمة في ديننا.. وهو اوسط الايمان اذا لم نستطع الدفاع عن الحق .. وازلة الباطل بــ (فعل) و الذي هو اعلى مراتب الايمان ...والله المستعان ..نويت الجهاد في سبيل الله :) ..